Volverá a ofertarse no CPI Atios e escolas unitarias do CRA

Valdoviño, 22 de xuño do 2023. Apenas rematado o curso, o Concello de Valdoviño abre xa o prazo para que as familias interesadas no programa municipal Concilia Tempos Mañás poidan inscribirse de cara ao próximo curso 2023-2024. A partir deste venres poderán descargar o impreso de matrícula da web municipal –no apartado Servizos Sociais en Rede, programa Concilia Mañás-, e presentalo no rexistro da casa consistorial ou a través da sede electrónica. Ata o 5 de xullo, incluído. 

Trátase dun servizo de almorzos saudables acompañados de actividades didácticas e de lecer para facilitar a conciliación das familias de Valdoviño. O Concello de Valdoviño poñía en marcha hai 2 anos o programa, inicialmente no CPI Atios, e dende o curso pasado, tamén no CRA O Esquío. Iso si, para activalo debe reunirse un número mínimo de nenos/as usuarios/as. Os horarios para o próximo curso, de novo, volverán ser de 7:30 horas ata o inicio das clases. 

As prazas son limitadas e no caso de existir máis demanda procederase a baremar, tendo preferencia as familias empadroadas no Concello e nas que os membros adultos estean a traballar, as numerosas e as monoparentais. O prezo é de 30 euros/mes e 20 euros/medio mes.