No día de onte actuaron na zona de Pantín, coa retirada de máis de 1,6 toneladas de residuos, na súa maioría restos de madeira

As mariscadoras a pé continúan esta semana cos traballos de retirada do lixo mariño no marco do proxecto de recuperación dos bancos marisqueiros de Cedeira e Valdoviño. No día de onte, actuaron na zona do Funil, en Pantín, nunha xornada que concluíu coa extracción de máis de 1.600 quilogramos de residuos. Deles, a meirande parte foron restos de madeira (ata 1.500 kgs), así como plásticos, textil, metais ou goma. Uns traballos que continuarán con saídas este mércores e xoves á zona de Vilarrube.

O obxectivo principal é a retirada do lixo mariño, tanto o de procedencia do sector  pesqueiro como vellas artes de pesca e embarcacións, como o de orixe cidadá. Así mesmo, as mariscadoras tamén cuantifican e clasifican o lixo por tipoloxía, e unha vez pesado, é trasladado polo Concello de Valdoviño para a súa xestión.

O proxecto no que colabora o Concello está liderado pola Confraría de Pescadores de Cedeira e as Mariscadoras a Pé, e conta co respaldo da Consellería do Mar, e financiamento do Fondo Europeo Marítimo e da Pesca (FEMP).