A conselleira de Medio Ambiente e o alcalde visitan a Aula da Natureza, en pleno paseo da lagoa da Frouxeira, con motivo do Día Internacional dos Humidais
A conselleira de Medio Ambiente, Territorio e Vivenda, Ángeles Vázquez, e o alcalde de Valdoviño, Alberto González, visitaron esta mañá a Aula da Natureza-Punto de Atención á Infancia do municipio para celebrar, xunto aos/as escolares, a conmemoración do Día Internacional dos Humidais. Unha visita na que tamén tomaron parte concelleiras e concelleiros da corporación e na que coñeceron moi de preto o proxecto educativo destas instalacións, emprazadas en pleno paseo da lagoa e praia da Frouxeira. Precisamente, o seu emplazamento privilexiado centra as diferentes actividades e accións do PAI, coa base no coñecemento, respeto e conservación do medio.
Nesta liña, Vázquez destacou esta mañá as capacidades e o papel do humidais galegos para mitigar os efectos do cambio climático, e salientou que Galicia ten un gran tesouro e aliado nesta loita, como é o patrimonio natural.
Salientou que na Comunidade atopamos cinco exemplos de humidais con gran variedade de biodiversidade, entre as que se atopa a Lagoa de Valdoviño, que leva nesta lista desde hai un cuarto de século, ocupa 740 hectáreas; o complexo intermareal Umia-O Grove-A Lanzada, a única da provincia de Pontevedra e que conta con 2.476,72 hectáreas; na provincia da Coruña tamén se atopa o da Ría de Ortigueira e Ladrido, que forma parte de Ramsar desde o ano 1989 e ten case 3.000 hectáreas; ou o Complexo das praias, lagoa e duna de Corrubedo, que están incluídas na lista desde 1993 e que suman case 1.000 hectáreas.
Na provincia de Lugo, atópase a Ría de Ribadeo, entre Galicia e Asturias, que foi incluída na lista no ano 1994 e que suma unha extensión de 1.740 hectáreas, das que 563,44 están na comunidade galega.
Vázquez Mejuto argumentou ata seis razóns polas estas zonas húmidas son unha peza importante para o coidado e conservación do medio ambiente e da biodiversidade, pois almacenan e purifican a auga, actúan como mecanismos de control en épocas de inundación e protexen a costa fronte ás tormentas.
Tamén permiten a diversidade biolóxica, é dicir, que haxa moitas especies convivindo nun só espazo e son zonas de descanso e alimentación para as aves migratorias, axudan a frear o cambio climático, un dos grandes retos do presente e futuro, e son lugares referencia para a práctica dun ocio sostible e responsable.
Nese sentido, salientou que a celebración de actos e actividades son de gran importancia para concienciar aos alumnos dos centros educativos galegos da importancia de conservar e coidar o patrimonio natural, en xeral, e as zonas húmidas, en particular.
O Día Internacional dos Humidais celébrase cada 2 de febreiro, co fin de conmemorar a sinatura do convenio Ramsar no que se plasmou o primeiro acordo internacional para protexer estes espazos en 1971, hai case 50 anos, na cidade de Irán. Nesta ocasión, o lema escollido é ‘Zonas húmidas e a biodiversidade’. Na actualidade, a lista Ramsar está conformada por 2.200 espazos de todo o mundo, que suman máis de 2,1 millóns de quilómetros cadrados.
