Aprobados os pregos para a contratación do Servizo de Axuda no Fogar, cun investimento de 3,1 millóns nos próximos 4 anos
O pleno do Concello de Valdoviño aprobou a semana pasada por unanimidade os pregos que rexerán a contratación do Servizo de Axuda no Fogar. Un contrato no que se establece un investimento de 3.159.144 euros en catro anos, a razón de 789.786 euros anuais. Un esforzo inversor para a Administración local, xa que supón un incremento duns 100.000 euros por exercizo. Isto tamén se traducirá nun aumento das horas de atención mensual respeto ao 2019, xa que se estima pasen das 3.990 actuais ás 4.350 previstas. Facendo cálculos, unhas 360 horas máis ao mes.
O prezo de licitación da hora será de 14,50 euros máis IVE. Prezo unitario para horas ordinarias (de luns a sábado) e extraordinarias (domingos e festivos). Así mesmo, entre os criterios de adxudicación, as referencias técnicas (entre outras o plan de formación ou o emprazamento do local de referencia da empresa en Valdoviño) serán puntuadas cun máximo de 20 puntos. A oferta económica, cun máximo de 25 puntos; as axudas técnicas, con 6; as bolsas horarias adicionais anuais sen custe para o Concello, con 2, e as bolsas horarias noutros servizos, con 7.
Con carácter xeral, e entre outras, o contrato contempla a prestación dos seguintes servizos: apoio á mobilización dentro do fogar, axuda no coidado e hixiene persoal, axuda persoal para o vestido, calzado e alimentación, así como o control do réxime alimentario, supervisión e axuda na rutina de administración de medicamentos, fomento do adestramento na realización de actividades da vida cotiá no entorno doméstico, acompañamento fóra do fogar cando resulte imprescindible para posibilitar a participación da persoa usuaria en actividades de carácter educativo, terapéutico ou social, ou outra atención persoal necesaria para conseguir a finalidade do servizo e pautada no seu proxecto individual de atención.
Tamén, atencións de carácter básico e fundamental da limpeza e orde da vivenda e tarefas domésticas.
En todo caso, para cada persoa usuaria, o/a traballador/a social responsable enumerará no proxecto de intervención as accións que se deben realizar, excluíndo implicitamente as restantes.
+FINANCIAMENTO
Respeto á financiación deste servizo, o pleno do Concello de Valdoviño aprobaba o pasado mes unha proposta de Alcaldía na que se instaba á Xunta de Galicia e ao Goberno do Estado a asumir o custo da prestación do servizo de axuda no fogar, unha competencia que lles é propia ou, cando menos, dotar aos concellos das cantidades orzamentarias suficientes para facerlle fronte, chegando como mínimo á aportación que fai a Deputación. Así mesmo, acordaba solicitar á Administración galega unha negociación cos concellos, a través da Fegamp, encamiñada á aprobación dun sistema de financiamento xusto e acorde coas condicións laborais do ano 2020 que permita ás entidades locais manter e mellorar o servizo de atención á dependencia e axuda no fogar. Un diálogo que debería iniciarse nos primeiros catro meses deste ano.
