O programa “Lecturas compartidas” reúne ós estudantes do CPI Atios e ós maiores de Meirás e Sequeiro para falar do mundo do cabalo
O alumnado de 6º de Primaria compartiu os seus coñecementos sobre a experta equina Lucy Rees cos maiores e estes explicáronlles como se recurría ós cabalos para traballar a terra
O primeiro encontro interxeneracional do proxecto celebrouse esta mañá na antiga escola unitaria da Carreira
Lucy Rees, unha eminencia mundial no estudo do comportamento dos cabalos, foi a protagonista do encontro interxeneracional celebrado esta mañá na antiga escola unitaria da Carreira entre o alumnado de 6º de Primaria do CPI Atios e as persoas maiores das parroquias de Sequeiro e Meirás. Todos eles acudían á primeira xornada do programa “Lecturas compartidas fóra do centro”, que impulsa o centro educativo e no que colabora o Concello de Valdoviño, facilitando o transporte ás diferentes parroquias. Este ano, o segundo que se celebra, intégrase no proxecto “DNI: diferentes na igualdade” e, por este motivo, son mulleres as protagonistas das charlas entre estudantes e persoas maiores.
O alumnado de sexto, a través dunha presentación en power point, foi presentando a Lucy Rees, profesora galesa, etóloga equina, escritora e domadora, e descubrindo os seus coñecementos e investigacións en torno ó mundo do cabalo, especialmente a súa preocupación por dar a coñecer a doma natural e as fórmulas máis sinxelas para tratar cos cabalos. Ó remate, entablouse un ameno coloquio coas persoas maiores en torno ós coidados que precisan os equinos, no que os rapaces e rapazas demostraron ter grandes coñecementos.
Pola súa banda, os maiores compartiron cos nenos e nenas as súas experiencias vitais en relación ós cabalos e, así, unha das asistentes, Mari, explicoulles que hai medio século recurríase a eles para traballar a terra. Aínda así, sinalaba que o habitual era contar con vacas ou burros, xa que o cabalo era practicamente un luxo. Anécdotas e vivencias foron sucedéndose ata o remate do encontro.
O programa “Lecturas compartidas fóra do centro” continuará o 2 de marzo no local social de Vilaboa.
Galería de imaxes: Lecturas compartidas.
