O alcalde, Alberto González, e a concelleira de Turismo, Rosana García, acudirán a Madrid para participar na feira este mércores e xoves

Valdoviño, 20 de xaneiro do 2026. Un ano máis, Valdoviño volverá ter presenza en Fitur a través do Pantín Classic, o Xeoparque Cabo Ortegal, a Red de Pueblos del Surf e o Camiño a Santo André de Teixido. O alcalde, Alberto González, e a concelleira de Turismo, Rosana García, desprazaranse este mércores e xoves a Madrid para asistir á 46ª Feira Internacional de Turismo e participar das diferentes presentacións programadas nas dúas xornadas.

Un apretado programa que arrincará mañá mércores, coincidindo coa apertura do maior escaparate turístico nacional, no que se agarda a asistencia de máis de 155.000 profesionais e 100.000 visitantes na fin de semana. Rexedor e concelleira asistirán á inauguración do stand do Xeoparque sobre as 14 horas, e xa pola tarde, ás 16:15 horas, o alcalde participará na presentación do Pantín Classic no stand de Galicia. Así mesmo, ás 17 h, está prevista a presentación de “Ferrolterra máxica: tradición e natureza para todas as persoas viaxeiras”, a cargo da Mancomunidade de Concellos da Comarca de Ferrol, da que participa Valdoviño, centrada no Camiño a Santo André, e no Xeodestino Ferrolterra-Rías Altas como destino pet friendly.

E en nome da Mancomunidade, Alberto González tomará a palabra o xoves, ás 16 h, na presentación da Red de Pueblos del Surf que terá lugar no stand de Euskadi coa participación dos concellos de Carballo, Ribamontán al Mar, Castrillón e Getxo. Xa ás 17 h, acudirá a presentación do Xeoparque Cabo Ortegal no seu stand.