Organizado pola Asociación de Mulleres do Rural María del Mar Becerra co apoio do Concello, celebrarase en horario de mañá

Valdoviño, 7 de agosto do 2025. Valdoviño celebrará este sábado 9 de agosto unha edición especial verán do seu Feirón. Así o avanzaba a Asociación de Mulleres do Rural María del Mar Becerra, que promove o mercadillo de fin de mes co apoio do Concello. Deste xeito, a entidade colabora así na dinamización do corazón do centro urbano, organizando unha actividade con moi boa acollida por parte de veciñanza e visitantes, e aproveita tamén o tirón turístico da localidade neste mes de agosto para programar un novo mercadillo co que «premiar» a fidelidade dos vendedores e vendedoras que acuden durante todo o ano á súa cita en Valdoviño.

A gran explanada da Porta do Sol situada fronte á Casa Joselito acollerá deste xeito os postos, durante toda a mañá. Poderemos atopar roupa e complementos, alimentación e mesmo produtos da horta. Así mesmo, dende a asociación anímase a aproveitar a visita ao feirón para desfrutar tamén da ampla oferta hostaleira da zona.