A función terá lugar este venres ás 20:30 h no auditorio da casa da cultura

 Valdoviño, 28 de novembro de 2023. Teatro del Andamio inaugurará este venres en Valdoviño a programación cultural do mes de decembro coa representación da obra «Insubmisión». A función celebrarase no auditorio da casa da cultura a partir das 20:30 horas, con entrada de balde e libre ata completar aforo. 

Incluída na programación deseñada polo Concello para conmemorar o Día Internacional para a Eliminación da Violencia contra as Mulleres, a peza está dirixida a un público adulto, e fala da violencia que se xenera no ámbito familiar. Así, o texto conta a historia partindo de dúas premisas. A primeira é que a violencia non aparece explicitamente no texto. Trátase dunha violencia suxerida, subxacente… A tensión dramática medra ao redor desa violencia contida, pero que non estala sobre o escenario. A segunda é que “Insubmisión” non só se articula sobre a dor senón tamén sobre a esperanza. formulando unha rebelión ante os fíos que nos atan a unha vida desgarrada. Hai saída: é posible facer as maletas e pechar a porta.