Gran papel de surfistas de Valdoviño no Open Galego e no Internacional de surf adaptado que se disputaron no Pantín Classic
O local Rubén Sanmartín apúntase o trunfo na categoría master da proba autonómica e Antonio Muller, afincado no municipio, na clase Prone 1
Valdoviño, 25 de agosto do 2024. Intensa fin de semana no Abanca Pantín Classic Galicia Pro 2024, na que se resolvía, por unha banda, a competición internacional de surf adaptado e, por outra, o Open Galego de Surf, no que os deportistas da nosa comunidade se medían para obter un pase directo ás probas da World Surf League. En clave local, cómpre subliñar o trunfo de Rubén Sanmartín, promotor da escola RSM Surf Coach, na categoría master da proba galega, e a do grancanario, de ascendencia alemá, Antonio Muller, actualmente afincado en Valdoviño, nunha das clases de Para Surf.
O Pantín Classic integrábase este ano por primeira vez no circuíto de Para Surf League (PSL), converténdose a do Rodo nunha das catro praias a nivel mundial, que acollen as probas do campionato de surf inclusivo internacional. Nela participaron uns 40 deportistas, procedentes de Brasil, Estados Unidos, Marruecos, Suiza, Alemania, Francia, Gran Bretaña, Países Bajos, Portugal ou España.
As vitorias foron na clase stand 1 para Maxime Clarking; Hugo Rocha (stand 2); en Prone 1, Antonio Muller; Sarah Almagro e Afonso Faria (Prone 2) Emma Blanchet (Kneel); Ben Neumann (clase VI Imp 1) e o coruñés Dani Souto (VI Imp- 2). Todos eles e elas son, sen dúbida, auténticos exemplos de superación.
En paralelo, os surfistas da nosa comunidade competiron por facerse con un dos catro “wildcards” (pases de ouro) para competir nas probas da World Surf League, que comezan a disputarse este martes. Os pases masculinos foron, por terceiro ano consecutivo, para os irmáns Manuel e Juan Fernández (primeiro e segundo respectivamente do open masculino). Os femininos recaeron en Daniela Alonso e Lola Martínez (primeira e segunda no open). Finalmente, subliñar novamente a vitoria, por segundo ano consecutivo, na categoría master, deRubén Sanmartín.
Este luns chega con máis novidades no plano deportivo na 37 edición do Pantín Classic. Estrearase o circuíto celta no que competirán os e as mellores mellores riders de Galicia e de Portugal.
