Na Casa da Cultura xa se poden retirar as entradas para a función entre as 10 e as 14 horas

Peter Punk, o máis célebre dos pallasos galegos, regresa este domingo, 22 de agosto, a Valdoviño. E faino no marco da xira de presentación do seu novo espectáculo “Punkdemia”, no que ofrece a súa peculiar visión dos tempos que nos está a tocar vivir a causa do coronavirus. A actuación terá lugar en Vilarrube, a partir das 19.30 horas.

A contorna do colexio rural desta parroquia acollerá a nova proposta do recoñecido artista, dirixida ao público infantil e familiar, na que non faltarán os elementos de circo, os malabares, o clown e, por suposto grandes doses de humor e ironía.

“Punkdemia” pon o foco nas novas rutinas- o público descubrirá, por exemplo, como se viste un pallaso para protexerse da covid-19- no uso das máscaras, nas vacinas ou no equilibrio preciso para afrontar os procesos de desescalada.

Para asistir á función, incluída na Rede cultural da Deputación da Coruña, hai que retirar previamente a invitación na Casa da Cultura de Valdoviño, en horario de 10 a 14 horas (ata o venres ou ata esgotar prazas).