Invitacións dispoñibles na Casa da Cultura de 10 a 14 h ata o venres ou ata completar aforo

A programación cultural de Valdoviño sae á rúa e, se o venres o público poderá desfrutar en Meirás da proxección ao aire libre do filme Ons, o sábado 17 terá a oportunidade de divertirse no parque da Frouxeira co espectáculo «O Musical?», de Pedro Brandariz. Será a partir das 19,30 horas, con retirada de invitacións na Casa da Cultura. O prazo está aberto, de 10 a 14 horas, ata o venres ou esgotar prazas. 

«O Musical?» é un espectáculo onde a interacción co público é continua e permanente, seguindo todos os protocolos de seguridade fronte á covid-19. Todo estará preparado na Frouxeira para a interpretación dun “gran musical” por parte de Pedro Brandariz, pero comezarán a suceder unha serie de feitos inesperados que poderían levar a “gran cita” ó traste. Durante a función aparecerán diferentes personaxes que provocarán unha manchea de situacións cómicas e hilarantes. Un membro de Protección Civil, un enfermeiro de Urxencias, un repartidor de paquetes… e moitos máis personaxes tolos que farán imposible o “musical”. Se queredes descubrir se finalmente Brandariz conseguirá interpretar na Frouxeira o seu “gran espectáculo” deberedes reservar a vosa praza.