Nova xuntanza da Asociación para a Xestión do Xeoparque en Valdoviño

Os alcaldes e alcaldesa dos concellos integrantes da Asociación para a Xestión do Xeoparque de Cabo Ortegal –Cariño, Cedeira, Cerdido, Moeche, Ortigueira, San Sadurniño e Valdoviño- puxeron sobre a mesa os primeiros nomes para integrar o seu Comité Científico Asesor. Foi o tema central da orde do día da xuntanza celebrada onte en Valdoviño e o primeiro paso para a constitución deste órgano que, fundamentalmente, poderá informar e participar activamente en accións claves do xeoparque como a promoción de estudos científicos a favor da protección dos seus valores ou do desenvolvemento social e económico do territorio; définir criterios de protección ou dar visibilidade a publicacións, seminarios ou eventos de carácter científico. 

Fomarán parte del catedráticos e investigadores, estudiosos e figuras significativas no eido da xeoloxía, arqueoloxía, antropoloxía, desenvolvemento rural ou paisaxe. Consensuada a proposta internamente e co visto bo das persoas propostas, darase a coñecer á cidadanía.

Concellos de Cariño, Cedeira, Cerdido, Moeche, Ortigueira, San Sadurniño e Valdoviño