Permite expedir DNI e pasaporte no momento en municipios sen comisaría da Policía Nacional

Valdoviño, 16 de marzo do 2026. O subdelegado do Goberno na Coruña, Julio Abalde, desprazouse hoxe ata Valdoviño para comprobar in situ o funcionamento do Vehículo Integral de Documentación (VIDOC) da Policía Nacional, un servizo que permite tramitar e expedir de maneira inmediata o Documento Nacional de Identidade e o pasaporte.

Durante a visita, Abalde comprobou o proceso de atención á cidadanía e destacou a utilidade deste recurso para os concellos que non contan con dependencias da Policía Nacional. “Este sistema achega a Administración á cidadanía e evita desprazamentos innecesarios á veciñanza dos concellos”, sinalou. O propio alcalde de Valdoviño, Alberto González, foi un dos usuarios que fixo uso deste servizo, realizando os trámites de documentación a través do vehículo despregado no municipio. A súa participación permitiu verificar de primeira man a rapidez e comodidade do sistema.

O VIDOC, acrónimo de Vehículo Integral de Documentación, é unha iniciativa do Ministerio do Interior destinada a deslocalizar a expedición do DNI e do pasaporte e mellorar a accesibilidade destes servizos públicos. A través deste sistema, os cidadáns poden realizar todo o proceso nun único acto e recibir a documentación no momento. Os vehículos foron desenvolvidos no marco do Plan de Identidade Dixital da Dirección Xeral da Policía e contan coas mesmas funcionalidades que unha unidade fixa de documentación. Ademais, permiten tamén actualizar os certificados dixitais do DNI electrónico, grazas a un punto de actualización de documentación. A organización das citas corresponde aos propios concellos, que elaboran a listaxe de persoas que serán atendidas en cada xornada. Deste xeito, máis dunha trintena de persoas puideron realizar os seus trámites esta mañá no VIDOC en Valdoviño.

O subdelegado puxo en valor iniciativas que permiten achegar a Administración á cidadanía, especialmente en concellos que non contan con determinados servizos de maneira permanente. Neste sentido, destacou que recursos como o VIDOC facilitan que veciños de municipios rurais poidan realizar trámites administrativos sen ter que desprazarse a outras localidades, neste caso á Comisaría de Policía Nacional de Ferrol-Narón. Abalde subliñou que este tipo de medidas responden ao compromiso de levar os servizos públicos a todos os concellos garantindo unha atención máis próxima, accesible e igualitaria para toda a cidadanía.

Nesta mesma liña enmárcase o programa “A Administración cerca de ti”, unha iniciativa do Goberno de España que achega os servizos da Administración Xeral do Estado aos municipios de menor tamaño —xeralmente entre 500 e 8.000 habitantes— para facilitar a realización de trámites dixitais, a obtención de certificados electrónicos e do sistema Cl@ve, evitando así desprazamentos innecesarios da veciñanza.

Durante a visita, o subdelegado tamén mantivo unha reunión co alcalde de Valdoviño, Alberto González, e a concelleira Rosana García, para analizar diferentes asuntos de interese para o municipio. Entre eles, trataron o tema da eclipse de 12 de agosto deste ano que, en Valdoviño, poderá verse na súa totalidade. A eclipse comezará ás 19:31 horas e rematará ás 21:22 horas, tendo unha duración de preto de dúas horas. Galicia é un dos territorios en que se poderá ver na súa totalidade e se espera que acudan numerosos visitantes para poder observar este fenómeno astronómico. A Subdelegación do Goberno na Coruña está a manter reunións con todos os concellos da provincia para coordinar aspectos relativos á seguridade derivada dos desprazamentos cara aos puntos de observación da eclipse.