Participaron no certame un total de 23 artistas chegados de distintos puntos da Península

Valdoviño celebraba este sábado a segunda edición do seu Concurso de Pintura Rápida ao aire libre. O certame, centrado desta volta na paisaxe, o territorio e as xentes da parroquia de Meirás, que os participantes plasmaron nas súas obras contrarreloxo, contou con artistas galegos e máis outros procedentes de Castela León, Extremadura ou País Vasco. O primeiro quedou en Galicia. Foi para o recoñecido pintor vilalbés Eduardo Pérez Baamonde.

Na cita participaron 23 pintores, se ben finalmente, un deles decidiu non presentar o seu traballo, que foron quen de captar nas súas obras, a maxia das terras de Meirás: a capela do Porto, a praia do Río, as súas calas, a batería de Campelo, ou elementos da súa etnografía.

Tras a exposición dos cadros a concurso nas inmediacións do parque da Frouxeira o xurado, integrado por Manolo Carballeira, gañador da anterior edición, José Ángel Fernández, persoa vencellada ao mundo da Cultura en Valdoviño; Magdalena Bouzamayor, licenciada en Belas Artes; Enrique Vázquez, técnico de Cultura de Cedeira, e o alcalde de Valdoviño, Alberto González, emitía o seu fallo.

O primeiro premio, dotado con 1.000 euros e diploma foi para Eduardo Pérez Baamonde cunha obra que mostra un conxunto de hórreos localizado en Taraza. Francisco Victoria Canovas foi segundo (500 euros e diploma) e a terceira clasificada foi Mercedes Ballesteros (300 euros). No que atinxe ás distincións espaciais, o gañador do Premio Local foi Leopoldo González (200 euros) e o Premio Xuventude Proxecto Xeoparque Cabo Ortegal (150 euros) recaeu en Marín Núñez Lamas.

O alcalde, Alberto González, destacaba a boa participación rexistrada, que garante a continuidade da iniciativa, e felicitaba aos artistas que competiron nesta edición, pola capacidade mostrada para captar a espectacular beleza de Meirás a través da súa arte, e pola calidade dos traballos.