Celebrarase na praia de Pantín do venres 20 ao domingo 22 de xuño, coa presenza das futuras promesas do surf nacional

Valdoviño, 17 de xuño do 2025. A praia de Pantín acollerá do venres 20 ao domingo 22 de xuño o II Campionato Chiquiprós RSM de Surf, unha das cinco probas do circuíto nacional e a única que se celebrará este ano en Galicia. RSM Club de Surf, co seu responsable á cabeza, Rubén Sanmartín, presentaba esta mañá a competición deportiva xunto ao alcalde de Valdoviño, Alberto González, e o concelleiro de Deportes, Sergio Saavedra. Facíanno no Océano Surf Museo, en compañía dunha ampla representación do club anfitrión e algúns dos seus deportistas máis destacados.

O campionato dá o salto ao circuíto nacional na súa segunda edición, e tras ser recoñecido como o mellor evento de surf en 2024 pola Federación Galega de Surf. A excelente organización e a resposta de deportistas e clubs situáronno na elite, posición que non pensan abandoar. Así, Sanmartín aseguraba que esperan a presenza das futuras promesas do surf nacional nas dúas categorías en disputa, a KIDS -sub 10 e sub 12- e Junior -da sub 14 á sub 18-. Proceden de comunidades como Asturias, Canarias, Cantabria, Euskadi, Andalucía, Murcia e, como non, Galicia. E avanzaba algúns nomes confirmados: Iván Casanova, Carla Morera, Eloy Valle, Mateo Vázquez, Gael Ribera, Martina Pertegaz ou Carla Méndez. Nas quinielas tamén figuran os propios deportistas de RSM, que leva a honra ser o club con máis integrantes na selección galega, ata cinco. Deportistas campións como Anita Piñón, Lucas Piñón, Lucas Casal, Mar Cid ou Xabi Robles, que de seguro, pelexarán por pódium.

Así é todo, as inscricións marchan a bo ritmo, rondando o centenar, e coa previsión de superar as 120 -o prazo finaliza este mércores-. Neste contexto, a organización agradecía o apoio clave da Federación Española de Surfing, do Concello de Valdoviño e dos veciños e veciñas de Pantín, sen os que sería imposible celebrar o campionato. Tamén a colaboración e patrocinio de negocios locais e firmas, volcadas co evento.

Pola súa banda, o alcalde reivindicaba a aposta do club pola canteira, o auténtico futuro deste deporte, e poñía en valor o potencial do evento como dinamizador turístico da localidade, favorecendo a chegada de deportistas e das súas familias dende practicamente toda a xeografía estatal, cos consecuentes efectos positivos sobre o sector servizos. Un evento que, engadía, profundiza no valor da nosa industria máis potente, como é o mar.

CONCERTO ACÚSTICO

Xunto á competición, o público poderá desfrutar en Pantín doutras actividades complementarias. Entre elas, o concerto acústico do vocalista Mañu o sábado a partir das 20:00 horas. Incluído na programación deseñada pola Concellería de Cultura, o músico ofrecerá un recital repleto de clásicos do pop e rock nacional, no que non faltarán as versións dos temas máis coñecidos de artistas e grupos como Mclan, Fito y Fitipaldis, Los Secretos, Tequila, Leiva ou Revólver.

Haberá tamén espazo para a artesanía, con diferentes postos de venda, especialmente con selo local, ou o sorteo dunha morea de premios a través da posta á venda de rifas.

TROFEOS

Sanmartín avanzaba tamén que os trofeos levarán a imaxe gañadora do concurso escolar de debuxo que RSM Club de Surf organizou nas aulas do CPI Atios. A moza Alicia Villarnovo asina a obra estampada nos galardóns.

PATROCINADORES

Entre os patrocinadores do campionato atópanse: Hurley, Pro Surfboards, Riobó SAT, Rovil Studio, Óptica 826, Yow, DIA Valdoviño, Ártico, Gonorthy, Sex Wax, Churrería La Patrona, RSM Green Surf House, Las Olas By Pantín, Hippy Cream e Drop In.