O prazo está aberto ata o 23 de xullo

Valdoviño, 2 de xullo do 2025. O Concello de Valdoviño, a través da Concellería de Servizos Sociais, informa da apertura do prazo de presentación de solicitudes para tomar parte no Programa de Turismo do IMSERSO. A través do mesmo, as persoas maiores pensionistas poden desfrutar de viaxes fóra da tempada alta -de outubro a xuño- a prezos reducidos. Esta medida favorece un envellecemento activo, fomentando a súa autonomía, contribuíndo á prevención da dependencia e combatindo a soídade non desexada. Nos Servizos Sociais municipais axúdase ás persoas interesadas a tramitar a solicitude, que tamén pode presentarse directamente a través da sede electrónica do IMSERSO. O prazo conclúe o 23 de xullo.

O programa permite desfrutar de estancias de 8 ou 10 días en puntos da costa de Cataluña, Andalucía, Murcia ou Valencia, ou nas Illas Canarias e Baleares, ademais de escapadas de 4 a 6 días para participar en circuítos culturais, turismo de natureza, e capitais de provincia, entre outros.

Os servizos da iniciativa inclúen o aloxamento en réxime de pensión completa, transporte, póliza de seguro colectiva, servizo de mediciña xeral, complementario da Seguridade Social, e programa de animación sociocultural.