O Concello programa visitas guiadas á expo de Blanca Escrigas no Océano Surf Museo

A mostra amplía o seu paso por Valdoviño ata o 9 de maio

O Concello de Valdoviño programará a partir de mañá venres 30 de abril visitas guiadas á exposición de acuarelas de Blanca Escrigas que acolle o Océano Surf Museo. Unha mostra na que a arquitecta e pintora ofrece a súa particular visión de espazos urbanos do municipio. Precisamente, a boa resposta do público, levou a ampliar o paso da exposición por Valdoviño ata o vindeiro 9 de maio. Ao horario habitual de visita súmanse agora os percorridos guiados. Nun e noutro caso, as persoas interesadas en achegarse á obra de Blanca Escrigas deben facelo con cita previa, a través do correo do museo oceanosurfmuseo@gmail.com.

Os horarios da exposición son: de martes a domingo de 11 a 14 h e de 17 a 19 h. Os festivos, de 12 a 14 h e de 17 a 19 h.

A primeira visita guiada terá lugar este venres ás 17 horas, e as seguintes celebraranse o 7 de maio ás 17 horas, o 8 de maio ás 12 horas e o 9 de maio ás 18 h.