As empresas interesadas en optar ao contrato, cun valor estimado cercano aos 60.000 euros, poden presentar as súas ofertas

Valdoviño, 23 de maio de 2024. O Concello de Valdoviño vén de sacar a contratación o servizo de limpeza diaria das praias de Campelo, O Río, O Cano Grande, O Cano Pequeno e Mourillá, A Frouxeira, Pantín, Porto Carrizo, O Baleo e Vilarrube. Investirá no contrato 59.274,86 euros, que co-financiará grazas a unha achega da Deputación da Coruña, e as labores desenvolveranse diariamente entre o 15 de xuño e o 15 de setembro. As empresas interesadas en optar á licitación xa poden presentar as súas ofertas, ata o 4 de xuño, e consultar as condicións e documentación na plataforma de contratación do sector público.

O servizo comprenderá, entre outras, as seguintes tarefas:

-Limpeza, retirada e xestión de residuos nas zonas de praia ou nos accesos ás mesmas, así como daqueles depositados polas mareas -en coordinación co Concello e/ou administración competente-

-Baleirado das papeleiras con reposición dos sacos de lixo, e xestión, conforme á súa natureza, dos residuos

-Retirada de area dos paseos, duchas ou accesos ás praias

-Apertura, peche, limpeza e desinfección dos baños públicos existentes nos areais, xa sexan fixos ou portátiles, con hixienizado dos elementos sanitarios -un mínimo de 3 veces ao día e sempre que fose necesario, en todo caso-, retirando e xestionando calquera resto que se atope nos mesmos

-Desbroce e coidado de superficies nas inmediacións das praias e aparcamentos.

Dentro do obxecto do contrato incluiranse as seguintes tarefas, a realizar pola empresa adxudicataria, e que se terán en conta como melloras a valorar na adxudicación: tarefas de limpeza e mantemento na pista polideportiva sita na praia da Frouxeira; mantemento, desbroce, limpeza e desinfección dos parques infantís das praias da Frouxeira e de Pantín, e instalación, mantemento, limpeza e hixienizado de baños portátiles na praia de Campelo.