As persoas interesadas en tomar parte poden anotarse na Oficina Municipal de Turismo sita na Porta do Sol ou chamando ao 981 48 76 73

Valdoviño, 19 de xullo de 2022. O Concello de Valdoviño propón a veciños/as e visitantes realizar un percorrido pola Senda das Ondas. Un itinerario espectacular pola súa gran riqueza ambiental e paisaxística, con extraordinarias panorámicas da franxa litoral. As persoas participantes poderán cubrir parte deste itinerario, entre Marnela-Pantín e o Miradoiro do Paraño, a través da nova ruta guiada proposta no marco do programa «Valdoviño Mar». Celebrarase este sábado 23 de xullo a partir das 10:00 h. A participación é gratuíta, pero as prazas son limitadas, polo que se precisa de inscrición previa na Oficina Municipal de Turismo sita na Porta do Sol ou no teléfono 981 48 76 73. 

A ruta pola Senda das Ondas está dirixida a persoas de todas as idades -menores acompañados dunha persoa adulta-, é de dificultade baixa e duración estimada de dúas horas e media. 

«Valdoviño Mar» lévase a cabo co apoio económico do GALP A Mariña-Ortegal e o Fondo Europeo e Marítimo de Pesca.