O taller, que desenvolve a entidade cultural BenCuriosa e financia a Deputación, está especialmente pensado para as persoas vinculadas a asociacións e colectivos do municipio

O Concello de Valdoviño acollerá en marzo o obradoiro en liña  “Construímos un relato”, que ten como obxectivo facilitar a creación de contidos dixitais a través das redes de maneira creativa e participativa, de maneira colaborativa e partindo dun tema común, vinculado ao territorio e á veciñanza.

Este  obradoiro está especialmente pensado para persoas vinculadas ao tecido asociativo de Valdoviño e da veciña Cedeira, interesadas en incorporar novas maneiras de comunicar e divulgar contidos, así como de crear comunidade, aproveitando as ferramentas dixitais.

Cun enfoque práctico, constará de 3 sesións dunha hora de duración os días 1, 15 e 22 de marzo ás 18,30 horas. Ofértanse un máximo de 20 prazas, e as persoas interesadas en participar deben cumprimentar este formulario antes do 12 de febreiro: https://forms.gle/uVD4Sd2Tc5jDXiqc6

O taller forma parte do proxecto Laboratorios Dixitais de Cultura Dixital, que desenvolve obradoiros relacionados co ámbito dixital en varios lugares da provincia. Esta iniciativa, que conta con financiamento da Deputación da Coruña e a colaboración da área de Cultura do Concello, é de carácter gratuíto.

O taller ten como obxectivo que as participantes aprendan facendo e que experimenten  xuntas sobre o desenvolvemento dun relato, vinculado á realidade e ao territorio, “escrito” con ferramentas dixitais que neste caso serán pricipalmente as redes sociais.