Celebrarase no auditorio da Casa da Cultura, organizado pola Surfing Medicine International co apoio da Administración local

Valdoviño, 31 de marzo do 2023. Durante esta Semana Santa, Valdoviño acollerá a IX edición do Congreso Mundial de Mediciña do Surf (WCSM). O prestixioso certame regresa ao hemisferio norte tralo seu paso por Australia para celebrar no municipio a súa edición anual. Será no auditorio da Casa da Cultura, tamén sede do Museo do Surf, do mércores 5 ao sábado 8 de abril. Da man de prestixiosos ponentes, traerá os últimos avances científicos sobre a saúde dos surfistas, a prevención de lesións, a prevención de afogamentos e reanimación, o papel dos surfistas como socorristas, a formación, o rendemento do surf, o liderado e a educación ou o medio mariño.

Trátase, segundo explicou o alcalde, Alberto González, do primeiro congreso internacional que se celebra en Valdoviño, brindándolle ao municipio un magnífico escaparate de promoción exterior que, ademais, incidirá especialmente no sector servizos. 

O programa estará repleto de conferencias inspiradoras, obradoiros e actividades ao aire libre, como as que se celebrarán o xoves á tarde na praia da Frouxeira, a cargo dos principais especialistas e comunicadores a nivel internacional. Un congreso que ofrecerá contido académico premium nun formato atractivo e interactivo, que brinda unha plataforma científica, baseada na evidencia, para todas as partes involucradas no surf actual. Nel, confirmaron asistencia unhas 60 persoas procedentes de todo o mundo. Médicos, enfermeiros, fisioterapeutas, preparadores físicos, adestradores ou técnicos de surf tanto nacionais como chegados de fóra de España. 

Así, o programa do congreso, que coordina en España o neurociruxán galego Pedro Reimunde, estará adicado cada día a un tema que reflicte as necesidades do surfista actual: 

5 de abril. Trala apertura de portas, curso pre-congreso 1: Afogamento en medio acuático e Reanimación; Curso pre-congreso 2: Fisioterapia e Ortopedia en surfistas 

6 de abril. Lesións agudas, rescates, reanimación e traumatismos 

7 de abril. Prevención de lesións e rendemento 

8 de abril. Liderado, educación e impacto 

Así mesmo, toda a información está dispoñible a través da web do WCSM23: https://www.surfingmed.com/world-conference-2023/