O Concello de Valdoviño abre este luns inscricións en Concilia Deportes Nadal
A iniciativa combina actividades deportivas e obradoiros didácticos e busca botar unha man ás familias para conciliar nas vacacións escolares
Valdoviño, 29 de novembro do 2024. O Concello de Valdoviño abrirá o vindeiro luns 2 de decembro as inscricións nunha nova edición de Concilia Deportes Nadal, os campamentos cos que botar unha man ás familias á hora de compatibilizar obrigas laborais e familiares durante as próximas vacacións escolares. Repite escenario, e celebrarase no pavillón municipal do Longoiro, os días 23, 26, 27 e 30 de decembro, e 2 e 3 de xaneiro, en horario de 8:00 a 14:00 horas (e posibilidade de entrada entre as 8 e as 10 h). Está ideado para nenos e nenas de entre 4 e 12 anos (cumpridos este ano), e o custe da actividade é de 22,12 euros por participante.
Entre as actividades a desenvolver, todo tipo de deportes e obradoiros. Cada día, unha diferente. Tenis, bádminton, atletismo, baloncesto, fútbol, xogos tradicionais, golf… e talleres de decoración e de cociña, cine de Nadal, festas temáticas ou xogos con música…
O prazo para anotarse permanecerá aberto ata o 16 de decembro -incluído-, tanto na casa consistorial como a través da sede electrónica (https://sede.concellodevaldovino.com/sxc/gl/procedimientosytramites/tramites/SolicitudProgValdovinoSaudableyExtraescolare) e a ficha pode descargarse da web municipal.
En caso de que a demanda exceda a oferta de prazas, terán prioridade os nenos e nenas empadroados/as en Valdoviño.
