Os postos de venda compartirán espazo cunha programación cultural que inclúe obradoiros, concerto, teatro ou punto de troco de libros

Valdoviño, 20 de xuño do 2025. O Concello de Valdoviño celebrará unha nova edición do seu Mercado Ecolóxico o vindeiro sábado 28 de xuño, e a concelleira de Turismo e Cultura, Rosana García, avanzaba esta mañá algúns dos seus principais contidos. Regresará á Porta do Sol durante toda a xornada, de 12:00 a 20:00 horas, e contará coa presenza dunha ducia de postos de venda de produto ecolóxico, de proximidade e residuo cero e artesán. Así mesmo, acompañarase dunha ampla programación de actividades complementarias. Entre elas, obradoiros de composicións florais con follas de millo e de cerámicas. Terán participación gratuíta e inscrición dende media hora antes do seu inicio, previsto para as 12:00 h e as 17:00 h con «As lolas da cascarilla» e «Mai Cerámica».

Tamén, o concerto ás 13:30 horas de Erick LePeich, cantautor galego que cultiva estilos tan variopintos como a bossa nova, o pop ou o funky, ou o espectáculo «Cabicivai» de Pablo Pablísimo ás 18:30 horas.

Durante toda a xornada, habilitarase un punto de troco de libros e o mercado contará cun espazo infantil.

Nas vindeiras xornadas, avanzaranse os postos e os produtos que integrarán este ano unha feira que, como apuntaba Rosana García, ten unha posición xa consolidada no calendario local.