Abre inscricións nos dous primeiros talleres, que se celebrarán os días 23 de abril e 7 de maio no centro sociocomunitario

Valdoviño, 14 de abril do 2026. O Concello de Valdoviño activa o programa de prevención do risco dixital dirixido a familias “Medrando entre pantallas”, e abre inscricións nos dous primeiros obradoiros, previstos para o xoves 23 de abril, e máis o xoves 7 de maio. Nos dous casos, ás 16:30 horas no centro sociocomunitario. A participación é de balde, con prazas limitadas e a reserva pode realizarse presencialmente no departamento municipal de Servizos Sociais -planta baixa da casa consistorial-; no teléfono 981 48 70 41 extensión 5 ou email servizos.sociais@concellodevaldovino.com.

Con este programa, que conta con financiamento do Pacto de Estado contra a Violencia de Xénero, a concelleira de área, Rosana García, apunta que o Concello busca promover un uso responsable e seguro de Internet, especialmente fronte a contidos non adecuados para a idade -pornográficos ou violentos-; concienciar sobre o impacto das tecnoloxías no desenvolvemento e na saúde emocional e física; fomentar hábitos saudables, autocontrol e responsabilidade no uso dos dispositivos dixitais, e impulsar pautas de desconexión e equilibrio dixital.

E ADEMAIS…

O Concello lembra que continúa aberto o prazo de inscrición no obradoiro “Benestar emocional nas familias”, que impartirá persoal técnico do centro Quérote+ este xoves 16 de abril ás 16:30 horas en Valdoviño sempre e cando se reúna un número mínimo de persoas participantes.