O Concello abre o prazo para solicitar as axudas para os agasallos de Nadal
Están dirixidas a pais, nais, titores e familias de acollemento con fillos/as menores de idade, empadroados en Valdoviño e uns ingresos que non superen os establecidos na convocatoria municipal
Valdoviño, 26 de novembro de 2021. O Concello de Valdoviño abrirá o luns 29 de novembro, e ata o vindeiro 10 de decembro (incluído), as axudas de Nadal para a adquisición de agasallos. Unha liña de subvencións dirixida a garantir que todos os nenos e nenas poidan ter o seu agasallo nestas datas, apoiando a situación económica na que se atopan algunhas familias e tentando minimizar o impacto socioeconómico derivado da crise sanitaria ocasionada pola covid-19. Trátase dunha axuda dunha cuantía única de 50 euros e, no seu conxunto, o Concello destinará a este capítulo 4.000 euros.
Os gastos a subvencionar serán:
-xogos e xoguetes (0- 18 anos): xoguetes, libros, xogos educativos ou de mesa, libros, quebracabezas, e/ou material musical ou deportivo, ou calquera que se corresponda coa idade do/a menor ao que vai dirixida a axuda.
-aparatos tecnolóxicos e roupa (13-18 anos): roupa, uniformes deportivos, aparatos tecnolóxicos como reloxos, videoxogos, teléfonos, que sexan axeitados para esa franxa de idade.
As axudas están dirixidas a pais, nais, titores/as ou familias acolledoras con fillos ou fillas menores de idade e empadronados/as en Valdoviño e non superar uns ingresos mínimos establecidos nas bases da convocatoria (que poden consultarse na web municipal).
As solicitudes e a documentación requirida presentaranse no Rexistro Xeral da Casa do Concello de Valdoviño de luns a venres en horario de 9 a 14 horas ou a través da sede electrónica. Así mesmo, e en caso de concesión da axuda, deberá xustificarse o gasto entre o 10 e o 24 de xaneiro de 2022.
En todo caso, concederase un vale persoal e intransferible para canxear en establecementos de Valdoviño e doutros municipios limítrofes como xogueterías e tendas de roupa. Son estes:
- Cooperativa de Meirás (Valdoviño)
- Cooperativa de Lago (Valdoviño)
- Cooperativa de Vilaboa (Valdoviño)
- Con fío de Inés (Valdoviño)
- Electrodomésticos Nito (Valdoviño)
- Gran Casa China (Valdoviño)
- Librería Xeila (Valdoviño)
- Xoguetería Din Don (Narón)
- Xoguetería Muíño do Fabal (Narón)
- Sprinter deportes (Narón)
