O Concello abre inscricións no novo curso da Aula de Artes Plásticas, que guiará de novo o pintor Manuel Carballeira
As clases celebraranse os martes no local social de Loira
Valdoviño, 30 de setembro do 2024. A partir de hoxe e ata o 10 de outubro, o Concello de Valdoviño abre o prazo de inscrición na Aula de Artes Plásticas que guiará ao longo do curso o pintor Manuel Carballeira no local social de Loira. A actividade, de carácter interxeneracional, está dirixida a nenos e nenas de 7 anos en adiante e persoas adultas. Como na pasada edición, e dada a boa acollida da iniciativa, haberá dous grupos, os martes. O primeiro, de 16:30 a 18:30 h, e o segundo, de 18:30 a 20:30 h. A previsión do departamento municipal de Cultura é botar a andar as clases o 15 de outubro, unha vez finalizada a matrícula.
O trámite pode realizarse presencialmente na casa da cultura, de luns a venres de 10 a 14 h, ou a través da sede electrónica na web municipal. A cuota mensual é de 22,12 euros para menores de idade, e de 29,49 euros para maiores de 18.
No caso de que a demanda exceda a oferta de prazas, terán prioridade, por esta orde, as persoas empadroadas en Valdoviño matriculadas no curso anterior e que tivesen finalizado o mesmo; as persoas empadroadas no noso municipio; aquelas non empadroadas matriculadas no curso anterior e que, como no caso anterior, finalizasen o mesmo, e finalmente, as persoas non empadroadas. Se hai empate, realizaríase un sorteo.
