O Concello abre este venres o prazo de inscrición no programa Concilia Tempos Verán
Debe formalizarse a través do rexistro xeral ou telematicamente
Valdoviño, 1 de xuño de 2022. O Concello de Valdoviño abrirá este venres 3 de xuño o prazo de inscrición no programa Concilia Tempos Verán!, dirixido a nenas e nenos de entre 4 e 12 anos. Un programa de conciliación da vida laboral e o coidado dos fillos e fillas durante os meses de xullo e agosto que ofrecerá diversas propostas de lecer didáctico todas as mañás de luns a venres de 10 a 14 horas (e con horario de entrada dende as 8,30 horas).
As persoas interesadas en inscribir aos seus fillos ou fillas poden descargar a ficha da web municipal e deben entregala no rexistro xeral municipal ou presentala telematicamente. O prazo conclúe o 17 de xuño (incluído).
Os campamentos celebraranse no local social de Pantín, e no caso de precisar un segundo espazo en función das inscricións optarase polo local social de Aviño. A programación contemplará xogos, manualidades, deportes e a exploración do medio natural, con tempos para o xogo libre e os paseos pola contorna.
A cota de participación é de 50 euros por mes e neno/a (no caso de irmáns/ás aplicarase un desconto do 20%).
Para obter máis información sobre os criterios de preferencia na concesión ou calquer outro dato, a veciñanza pode dirixirse ao departamento municipal de Servizos Sociais ou teléfono 981 48 70 41.
