Os estudantes de 2º da Escola Técnica Superior de Arquitectura toman as antigas infraestruturas militares de Valdoviño como referencia para a elaboración dos seus proxectos académicos durante este ano

 Valdoviño, 25 de setembro do 2023. Valdoviño, e máis concretamente as baterías de Monte Campelo, converteranse no laboratorio de ideas para os proxectos que deseñen ao longo do curso os alumnos e alumnas de 2º curso da Escola Técnica Superior de Arquitectura da Coruña. O equipo docente elixía o noso municipio como escenario real da asignatura de Análise da Arquitectura, e os 140 estudantes que a cursan achegábanse esta mañá a Valdoviño para participar nunha clase maxistral a cargo de Manuel González Gutiérrez, presidente de Valdoviño Azul, gran coñecedor das antigas infraestruturas militares da zona e autor do libro «Monte Campelo e Punta Frouxeira. Importancia militar e aproveitamento mineiro». Unha charla organizada polo Concello no auditorio municipal, na que tamén participaba o alcalde, Alberto González.

O rexedor agradecía a iniciativa da universidade, xa que supón unha excelente oportunidade para dar a coñecer o municipio entre os máis novos e novas, un descubrimento para a maioría deles, segundo admitiron. Así mesmo, e tirando da súa profesión de arqueólogo, Alberto González daba unhas pinceladas sobre a evolución histórica do territorio centrándose na zona de Monte Campelo, e poñía en valor a relevancia deste no marco do Xeoparque Cabo Ortegal.

Trala conferencia, os estudantes trasladábanse en dous autocares ata Meirás, para iniciar o percorrido polas baterías e coñecer in situ o territorio. A partir de aí, traballarán nas aulas por equipos e de forma individualizada planteando proxectos para a zona dos que xa se comezou a falar hoxe. Entre eles, observatorios, áreas de esparcemento, refuxios ou mesmo un centro de interpretación.