Inscricións abertas na programación OcioSol na piscina municipal de Lago, con cursos de natación, aquagym e nado libre
O prezo das actividades oscila entre os 7,37 e os 8,86 euros ao mes
Valdoviño, 13 de xuño de 2024. A Concellería de Deportes abre inscricións, ata o 21 de xuño, na programación OcioSol 2024 na piscina municipal de Lago. Durante os meses de xullo e agosto, contempla cursiños de natación para nenos e nenas, con 4 grupos en iniciación; 2 en intermedio e 1 en perfeccionamento. Tamén haberá cursos de natación para bebés -de 4 a 36 meses acompañados/as dunha persoa adulta-, e clases de aquagym, ademais de nado libre.
As clases e sesións terán lugar polas mañás, xa que as tardes se reservan para o uso e desfrute das instalacións por parte de veciños e visitantes, e coa previsión de abrir as instalacións o 1 de xullo. A inscrición en OcioSol 2024 na piscina debe realizarse a través do formulario habilitado na web municipal www.concellodevaldovino.com
Os prezos das actividades oscilan entre os 7,37 euros e os 8,86 euros ao mes. En caso de que a demanda exceda a oferta de prazas, as persoas empadroadas no municipio terán prioridade na concesión, e a veciñanza ten á súa disposición o número de Deportes 626 46 55 31 para realizar as súas consultas (de luns a venres de 9:00 a 13:00 horas).
