Celebrarase en 2 sesións o 5 e 13 de decembro, de 10:00 a 13:00 horas

 Valdoviño, 22 de novembro de 2023. No marco da programación «Somos e contamos», o Concello de Valdoviño celebrará o obradoiro «Encantada de coñecerme». Constará de 2 sesións guiadas pola Federación de Planificación Familiar, os días 5 e 13 de decembro en horario de 10:00 a 13:00 horas no centro sociocomunitario. Está dirixido a mulleres de 18 anos en adiante, e a participación é de balde, con inscrición previa nos Servizos Sociais Municipais -planta baixa da consistorial ou teléfono 981 48 70 41 ext.5-. 

No taller, abordaranse conceptos importantes para a saúde e desenvolvemento das mulleres ao longo do seu ciclo vital. Entre outros contidos, falarase de sexualidade, saúde sexual; autoestima e benestar; momentos vitais clave; puberdade, menopausa e climaterio; erótica e reprodución; hixiene e coidados; maternidade; prácticas conceptivas, aconceptivas e métodos anticonceptivos; identificación da violencia sexual e de xénero; creación de relacións positivas e saudables; sistema normalizado de atención á saúde, ou recursos de proximidade.