Ao redor de 220 atletas de todas as idades participaron nas carreiras desenvolvidas na contorna do encoro

Valdoviño, 15 de xuño do 2025. Calorosa e animada xornada de atletismo en Valdoviño. Ao redor de 220 corredores/as de todas as idades participaron finalmente nas probas da “VIII Volta ás Forcadas”, organizada polo Concello, co apoio da Federación Galega de Atletismo, e incluída no circuíto da XI Deputación da Coruña. A vitoria na carreira absoluta foi para Esteban Díaz Pérez, e Verónica Bugliot Fernández acadou o mellor tempo entre as mulleres. O alcalde de Valdoviño, Alberto González, e o concelleiro de Deportes, Sergio Saavedra, presenciaron o desenvolvemento da competición, xunto ao edil de Obras, Alejandro García, e posteriormente participaron na entrega de medallas.

Segundo o previsto, a partir das 11 horas, principiaban nas inmediacións do campo de fútbol Juan Sabín, en Vilaboa, as carreiras dos menores (con distancias, segundo a idade, de entre 100 m e 2,5 km), anticipo da proba principal da competición. Un percorrido por asfalto de 9 km, pola contorna do “mar interior” de Valdoviño, o encoro das Forcadas.

Nesta ocasión, foron 160 atletas os que tomaron parte na competición absoluta, que se iniciaba minutos despois do mediodía. Esteban Díaz, do Atletismo Narón, foi o primeiro en completar o itinerario, nun tempo neto de 33:04 minutos. Apenas sete segundos despois atravesaba a liña de meta Jaci Mello, do Club Atletismo Boiro. O terceiro clasificado foi Fernando Lorenzo, do AD. Náutico de Narón. A primeira atleta na clasificación xeral foi Verónica Bugliot, de Os corzos do Ortegal, seguida de Rebeca Soto, do Atletismo Narón, e de Inés Santiago (ver resultados)

Finalizada a proba, procedíase á entrega de medallas da competición, destinada a fomentar o lecer activo e a dar a coñecer a contorna do encoro que segue medrando. No acto, ademais dos representantes municipais, participou Javier Sabín, da Cooperativa de Vilaboa, á que dende o Concello se agradece a colaboración. A administración local subliña ademais o apoio brindado por parte de Policía Local e de efectivos de Protección Civil de Valdoviño.

Consulta aquí todos os resultados da VIII Volta ás Forcadas