Non é algo novo, aínda que parece que a tendencia disparouse polo impacto mediático conseguido polo banco ortegano, utilizado en campañas publicitarias de Ikea ou Turgalicia; e hoxe convertido no maior reclamo turístico dunha zona privilexiada desde o punto de vista paisaxístico.

Os exemplos de Valdoviño

A moda dos bancos en cantís, estreitamente ligada ao fulgurante bum do selfie e, por suposto, ao gusto atávico por arrimarse ao precipicio para sentir a vertixe e comprobar a forza do océano, non é allea tampouco a Valdoviño. E así, os adictos a este tipo de autorretratos costeiros teñen parada obrigada nas proximidades da praia do Baleo e, abrigo, no espectacular litoral de Meirás, xunto ás calas de O Rego e O Cortello.
Os bancos de Valdoviño miran ao Atlántico como o famoso de Loiba ou o non menos coñecido de Cabo Touriñán. E aínda que desprovistos do halo especial que converte a aqueles en punto de peregrinación, tamén teñen o seu público. É cuestión de gustos. «Este si que é o mellor banco do mundo» reza- con certa sorna, e non sen razón- o respaldo dun banco sempre solitario, situado en Furnas (Ortigueira), a apenas 50 metros do que atrae en masa a miles de visitantes. Así somos.
Convencidos de que a instantánea paga a pena, propoñémosvos unha visita pola contorna deses bancos do litoral Valdoviño. Só lles falta que unha foto os catapulte ao éxito. Desde o Concello de Valdoviño animámosvos a tentalo…