Desenvolverán campañas de concienciación para facer de todos os areais do municipio lugares máis saudables 

O Concello de Valdoviño vén de asinar un convenio pioneiro na comarca en materia de saúde coa Asociación Española Contra el Cáncer (AECC). En virtude do acordo, fomentarase o traballo de concienciación para acadar que as praias da localidade sexan espazos sen fume. Unha medida que convertería os areais do municipio en lugares máis saudables, contribuíndo a previr enfermidades crónicas asociadas ao tabaquismo.

O alcalde, Alberto González, subscribía esta semana o convenio coa AECC, representada pola vicepresidenta da Xunta Local de Ferrol, Mabel Sanesteban, para apoiar a proposta da asociación de impulsar ambientes libres da exposición ao fume nocivo do tabaco tradicional e do electrónico nos espazos abertos de uso público e colectivo.

Na actual campaña estival só a praia de Mourillá está incluída no censo oficial de “praias sen fume” da Xunta, pero a concellería de Benestar Social e Sanidade, Ana Belén Pérez, avanza a vontade de incorporar ao listado nas vindeiras campañas ao resto das praias do municipio, entre as que se atopan algunhas das máis concorridas de Ferrolterra. Polo de agora o Concello traballará coa AECC co obxectivo de concienciar á veciñanza do prexudicial que resulta o tabaco para a saúde, e intentar eliminalo das paraxes con maior concentración de xente durante o verán. Os primeiros beneficiados serán os menores e os fumadores pasivos.

Medida educativa

Explican dende o goberno local que a iniciativa ten un carácter educativo e de promoción da saúde. Recomendarase que non se fume -obviamente non haberá sanción para quen incumpra- e, a través de mesas informativas, explicarase a importancia de liberar de tabaco os areais.

As praias valdoviñesas contarán con carteis, agradecendo o comportamento daqueles fumadores habituais que respecten o consello de non fumar nos areais e axuden con seu xesto a conseguir unha contorna máis saudable, e a reducir os casos de cancro.

De ter éxito a recomendación, conseguiríase tamén un impacto positivo no medio ambiente, pois as cabichas tardan máis dunha década en destruírse, constituíndo un problema importante para a limpeza das praias e do mar.