- Galego
- Español
- English
Manifesto polo 25-N: Día Internacional para a Eliminación da Violencia contra as Mulleres
O Concello de Valdoviño conmemora, un ano máis, o 25 de novembro como data simbólica que lembra que a violencia contra as mulleres segue a existir en múltiples formas, tempos e espazos.
A sensibilización social e a loita feminista permitiron destapar unha realidade histórica de violencia e opresión, unha realidade que muda e se transforma nos diferentes momentos e contextos pero que segue presente ao longo dos anos.
O feminismo, trascende a ser unha teoría social, converténdose nun valor real no que as persoas se posicionan. Así, dende unha actitude crítica e proactiva procuran unha igualdade de oportunidades para homes e mulleres que equilibren as relacións, corrixan as tendencias estructurais do patriarcado e preveñan as agresións contra as mulleres polo feito de selo.
O traballo realizado a nivel educativo, social e político trouxo un maior recoñecemento das múltiples violencias, máis ferramentas para a súa detección e unha lexislación que trata de garantir unha igualdade real de oportunidades, amparando en maior medida ás vítimas. A elaboración de Plans de Igualdade, os proxectos socioeducativos nas escolas, o compromiso de entidades e institucións, a formación de profesionais, a publicación de bibliografía ou os avances no estudo das ciencias sociais e da educación permiten actuar con maior coñecemento e contundencia na orixe das desigualdades e combater as múltiples formas de violencia.
No caso de Valdoviño, trabállase durante todo o ano dun xeito directo, non só transversal, engadindo obxectivos, metodoloxías activas e criterios avaliadores en todas as actividades e servizos que se impulsan dende o programa municipal “Somos e Contamos”. A través deste programa aténdese á infancia e adolescencia, procurando que na construción das súas persoas teñan a opción de gozar dunha liberdade persoal e sexual, cuestionando os modelos establecidos socialmente e elixindo entre unhas masculinidades e feminidades diversas. Ademais, trabállase coas familias pautas coeducativas que sexan protectoras para os rapaces e rapazas, non só para convivivir dun xeito igualitario na sociedade senón tamén para establecer unhas relacións de parella de respecto mutuo que desmitifiquen o amor romántico.
Seguirase a traballar para que a nivel comunitario cada vez sexan máis as persoas formadas e concienciadas coa necesidade de construir identidades menos oprimidas por un sistema tradicional e ofrecer modelos e relacións máis xustas e democráticas.
Polo tanto , segue a ser preciso e urxente non descansar tralos logros conseguidos. O Concello de Valdoviño segue a recoñecerse social e feminista e seguirá a traballar cun forte compromiso diario.