Os enseres retirados da vía pública este verán multiplícanse por dous
A cantidade de mobles e enseres retirados por parte do Concello de Valdoviño experimentou un espectacular incremento co inicio do verán. Segundo os últimos datos dos que se dispón, do mes pasado, retiráronse un total de 28.880 kilogramos da vía pública, o que supón un aumento do 48,25%. Pero o especialmente grave para o Concello de Valdoviño é o depósito de enseres na vía pública sen previo aviso, polo que fai unha chamada á responsabilidade. Lembra así que a cidadanía dispón dun servizo gratuíto de recollida de enseres a domicilio. É tan sinxelo como chamar ao teléfono 981 38 23 10 e, alí, comunicar o material do que un se quere desfacer.
Os responsables do servizo porán entón día e hora para que os usuarios depositen a carga no colector máis próximo á súa vivenda. Normalmente, á tarde noite para evitar que a presenza dos enseres cause molestias se ocupa un espazo na vía pública e o impacto visual no entorno. Dende a Concellería de Servizos que dirixe Benito Vega lémbrase que a recollida non ten custe para a veciñanza, xa que o Concello financia ao 100% o servizo.
Pese a dispor deste servizo, practicamente a metade dos servizos realizados son de oficio. É dicir, traballadores municipais –da Concellería, Policía Local…- ou os propios concelleiros detectan a presenza de vertedoiros incontrolados e depósitos de enseres realizados na vía pública sen previo aviso ao servizo. Tamén se rexistran queixas veciñais alertando da presenza de refugallos no espazo público.
Para combater esta situación, o concelleiro apela á concienciación e colaboración cidadá. Sinala que o camión de recollida admite dende sofás ata mobles. No caso dos electrodomésticos, e debido aos cambios normativos aplicados nos últimos tempos, deben depositarse no Punto Limpo. E, ao respecto, o Concello de Valdoviño conta cun convenio de colaboración coas instalacións de Narón para facilitar que os seus veciños poidan acceder a elas sen custe.
Utilizando estes servizos, gratuítos para a veciñanza, mantense unha conducta respectuosa co medio ambiente, facilitando o tratamento dos refugallos.
