A Casa da Cultura acolle, entre estrictas medidas de seguridade, os actos expropiatorios previos ao inicio das obras de acondicionamento da estrada Valdoviño-Cedeira
A Consellería de Infraestruturas e Mobilidade retomou onte os actos expropiatorios aos que están convocados/as os/as propietarios/as dos terreos necesarios para executar o acondicionamento da estrada Valdoviño-Cedeira, seguindo un estrito protocolo de seguridade.
Este é o primeiro dos actos de expropiación que se efectúa desde que se decretou o estado de alarma, e nel seguíronse as medidas sanitarias e de prevención recomendadas fronte á covid-19, cumprindo un estrito protocolo de seguridade.
Neste sentido, para garantir o proceso e todas as medidas de seguridade sanitaria estableceuse que o local debía dispoñer dunha superficie suficiente para garantir a separación mínima, zona de espera ampla e ventilación e limpeza frecuente, onde non se pode superar o límite de aforo e están dotados con carteis informativos e indicadores e xeles hidroalcohólicos. Mentres, os titulares das fincas teñen a obriga de asistir con máscara, ir só as persoas estritamente necesarias e non acudir no caso de presentar febre ou síntomas respiratorios.
Así, entre onte e hoxe a Casa da Cultura de Valdoviño acolle os 86 titulares das 136 fincas necesarias para executar estas obras na estrada AC-566. Para axilizar esta actuación, os/as propietarios/as dos terreos xa teñen tamén data de nova convocatoria para o levantamento das actas de ocupación, para os días 6 e 7 de agosto no mesmo lugar, tras o pago pola Administración dos depósitos previos.
Esta actuación céntrase na mellora dun treito de case 4 km da estrada autonómica AC-566, desde a saída do núcleo urbano de Valdoviño ata A Ramalleira.
Unha vez cumpridos os trámites expropiatorios, co levantamento de actas de ocupación, os terreos quedarán dispoñibles para a execución desta actuación de mellora da estrada Valdoviño-Cedeira, de cara a lograr unha maior mobilidade e seguridade viaria.
Estas obras están xa licitadas, presentándose un total de 22 ofertas, algunhas delas realizadas a través de unión temporal de empresas, polo que a participación no concurso ascende a 29 empresas.
