A Mancomunidade de Concellos da Comarca de Ferrol maniféstase en apoio do persoal de Noa Madera Creativa
Os nove concellos da Mancomunidade acordaron subscribir na reunión que mantiveron onte un manifesto institucional de apoio á empresa Noa Madera Creativa, polo mantemento dos postos de traballo e en contra da súa precarización. Ademais do anterior, na reunión mantida polos representantes dos concellos mediante videoconferencia, analizáronse conxuntamente as medidas relacionadas coa desescalada do estado de alarma e co apoio aos sectores e persoas máis prexudicados economicamente pola situación.
MANIFESTO INSTITUCIONAL DA MANCOMUNIDADE DE CONCELLOS DA COMARCA DE FERROL, EN APOIO Á PLANTILLA DE NOA, MADERA CREATIVA
Noa Madera Creativa é unha empresa situada no Polígono Industrial de Vilar do Colo en Fene, adícase principalmente a elaboración e instalación de mobiliario, entre outras, para tendas do Grupo INDITEX, de ADIDAS así como mobiliario para hoteis.
Na actualidade ronda os 160 traballadores e traballadoras nas Instalacións de Fene.
No ano 2018 o Grupo Malasa (adícase ao mesmo sector e que ten a maioria das instalacións en Cerceda, na cal no ano 2018 entrou como socio o Fondo de Investimento GPF-Capital) merca Noa Madera Creativa. Xa coa dirección de Malasa ao pouco de mercala, quixo levar adiante, alegando causas económicas, un ERE extintivo que ía supor o despedimento de cen traballadores e traballadoras.
Finalmente, grazas á mobilización e á imposibilidade de xustificalo (Noa viña de bater o seu récord de beneficios) o ERE non foi presentado.
Dende o proceso citado anteriormente desapareceron en torno a 40 postos de traballo das instalacións de Noa ao non renovar contratos temporais e ao despedimento individual de varios traballadores e traballadoras.
En novembro de 2019 o Grupo Malasa modificou as condicións laborais a parte da Oficina Técnica, con modificacións de horarios e traslados ás instalacións de Cerceda, sen negociación nin compensación para os traballadores e traballadoras afectadas.
Tras o acordo con parte da oficina técnica a maioría dos traballadores e traballadoras marcharon da empresa ou se desprazaron a Cerceda. A empresa comunícalle ao Comité a intención de realizar un ERE Extintivo para 78 traballadores e traballadoras e outro ERE de suspensión de 15 meses para o resto do cadro de persoal, que afectaría o uns 80 traballadores e traballadoras.
Dende o Comité temos claro que a intención do Grupo Malasa é precarizar as condicións de traballo en Noa Madera Ceativa, implantando o modelo Malasa que supón unha precarización das condicións laborais co incremento das empresas temporais e multiservizos, así como o incremento da contratación eventual na vez de contratación indefinida. En Noa Madera Creativa as condicións laborais son moito mellores que no Grupo Malasa.
POLO ANTERIORMENTE EXPOSTO:
1. A Mancomunidade de Concellos da Comarca de Ferrol defende o mantemento dos postos de traballo en Noa Madera Creativa nas instalacións de Fene, opoñéndonos ao desmantelamento da Empresa.
2. A Mancomunidade de Concellos da Comarca de Ferrol móstrase en contra da precarización das condicións laborais en Noa Madera Creativa, apostando por un emprego estable e cunhas condicións laborais dignas.
3. A Mancomunidade de Concellos da Comarca de Ferrol aposta polo diálogo e a negociación cos lexítimos representantes dos traballadores e traballadoras de Noa Madera Creativa e non polas medidas unilaterais levadas a cabo pola dirección do Grupo Malasa.”
