O Concello abre o prazo de inscrición no Festival de Comparsas de Valdoviño
A Concellería de Cultura de Valdoviño abrirá o vindeiro luns 17 de febreiro o prazo de inscrición no XX Festival de Comparsas, que terá lugar o sábado 29 de febreiro. Para formalizala é preciso presentar a documentación requerida na Casa da Cultura (que poderá descargarse da web municipal) e o prazo rematará o día 24 de febreiro (incluído). O horario de atención é de luns a venres de 11 a 14 horas.
O Festival de Comparsas repartirá 3.450 euros. En axudas á participación, 3.000 euros, dos que 300 euros/máximo por comparsa; 300 euros en axudas ao concurso nun vale canxeable no comercio e hostalería local, e 150 euros (en tres vales de 50 euros para comercio e hostalería locais) na categoría outros.
Haberá 2 categorías: comparsas adultos e outros. Nesta última categoría entran os disfrazados a título individual, as parellas de disfraces e grupos de ata cinco persoas. A título de disfrace individual non se admitirán menores. Porén, estes si poderán formar parte de parellas ou grupos sempre e cando o número de adultos sexa como mínimo do 50%. A parella ou grupo deberá de manter unha uniformidade de criterio na súa indumentaria.
O festival arrancará ás 17,30 h cun pasarrúas entre a casa consistorial e a casa da cultura. Neste último espazo habilitarase unha carpa para acoller o festival propiamente dito, que estará conducido polo cómico galego Pedro Brandariz.
Cada comparsa interpretará ante o público un máximo de dúas cancións ou parodias ou ben, unha parodia e unha canción. Así mesmo, polo menos unha delas terá que estar escrita e interpretada en linga galega e unha delas xirar en torno a Valdoviño.
O xurado estará integrado por un representante de cada unha das comparsas, que poderá votar a todas menos a aquela que representa. En todo caso, terán en conta a orixinalidade e vistosidade do disfrace, a posta en escena, as letras das cancións ou parodias, a simpatía e a animación de rúa que realice o grupo participante.
No seguinte enlace poden atoparse as bases do Festival e toda a inforamción sobre as subvencións a participantes: Bases que rexerán no XX Festival do Entroido do Concello de Valdoviño.
