O Baleo-Pantín, entre praias
- Distancia: 4,2 km.
- Tempo estimado: 01h20' a pé.
- Altitude (máxima/mínima): 65 m / 0 m.
- Desnivel acumulado: 319 m.
- Pendente (máxima/mínima): 16,26% subida, 22,57% baixada.
- Accesibilidade: A pé, bicicleta.
- Partida e chegada: 43º 38.644N, 008º 06.037W.
Camiño circular que transcorre entre as praias do Baleo e Pantín, con partida e chegada no aparcadoiro da primeira. Practicamente a metade deste percorrido transcorre por camiños de pescadores nas proximidades dos acantilados, polo que se recomenda a máxima precaución á hora de realizalo.
Nota: os contidos da ruta que aparecen en grosa fan referencia a variantes sobre o trazado principal.
Km 0,000 Arrancamos noso camiñar dende o aparcadoiro da praia do Baleo, deixando a praia e a súa área de recreo á nosa dereita. O camiño, asfaltado, ten lixeira pendente cara a arriba.
Km 0,347 Xiramos a man dereita e saímos do asfalto, que non volveremos pisar ata o km 3,200. O firme, ancho, agora é de terra e lixeiramente en costa abaixo.
Km 0,550 Tomamos o camiño da dereita e iniciamos unha suave pendente de suba. Seguimos camiñando de fronte gozando das vistas sobre a praia do Baleo á nosa dereita, así como dos acantilados e rompentes que se perden, a esa mesma man, no horizonte. Sobre o primeiro quilómetro do noso percorrido o camiño pasa a converterse nun pequeno sendeiro que se vai bifurcando unha e outra vez. Nós seguimos camiñando á fronte ata chegar ao bordo do acantilado chegando a Punta Torrella.
Aos nosos pés unha illa de rocha indícanos que debemos xirar á dereita buscando en todo momento o sendeiro que vai paralelo ao cantil. Bordeamos tamén Punta Gabeiras. Gozaremos da paisaxe: praias, escarpados cantís, fauna mariña e o ancho e inacabable horizonte mariño. Como vos podedes imaxinar está zona é un lugar privilexiado para os amantes á pesca, así como a praia de Pantín, que nos espera ao lonxe, éo para os amantes ao surf.
Km 2,300 Separámonos pouco a puco do cantil e volvemos a unha pista ancha e de doado camiñar.
Km 2,480 Xiramos á dereita, ao igual que no km 2,520. Dirixímonos cara a praia de Pantín.
Km 2,820 Pisamos a area da praia. Se levantamos a vista vemos o paseo marítimo, cara ao que diriximos os nosos pasos.
Km 3,140 Deixando o aparcadoiro á nosa dereita, xiramos cara a esquerda.
Km 3,191 Seguimos xirando á esquerda. A partir deste punto seguiremos sempre de fronte, pasando os lugares de Barreira, Trabes e Gabeiras, ata alcanzar tralo alto da costa unha pista de baixada que nos leva ao aparcadoiro do Baleo, dende o que partimos.
Km 4,198 Chegada.
(*) Ollo aos afeccionados ao pedal. A realización deste sendeiro en bici só se recomenda a persoal moi experimentado e, aínda así, proponse facer un pequeno corte ao traxecto no quilómetro 0,918, no que deben xirar á esquerda e facer un pronunciado descenso duns 300 metros, atallando desta forma uns 800 metros do traxecto a pé, ao que se incorporarán no quilómetro 2,071, xirando á esquerda. Se desexan ver de preto os cantís é mellor deixar a bici e achegarse a estes a pé e con precaución.
