O Concello activa A Frouxeira, Praia Accesible, un servizo para favorecer o uso e desfrute do areal para persoas con mobilidade reducida
O Concello de Valdoviño, en colaboración coa Asociación Aprende a Voar, activaba esta tarde o programa «A Frouxeira Praia Accesible». O alcalde, Alberto González, explicaba que se trata dun servizo municipal gratuíto que permitirá ás persoas con mobilidade reducida ou en cadeira de rodas desprazarse sen axuda polo areal e tamén entrar na auga. Será, como subliñou o representante de Aprende a Voar, a través do préstamo de 2 cadeiras autopropulsadas e un manta que facilita o acceso ao areal e o deslizamento das mesmas.
O servizo está dirixido a persoas en cadeira de rodas, aquelas con discapacidade motora en menor grao e mobilidade reducida. Segundo apuntou a concelleira de Benestar Social, Ana Belén Pérez, nas vindeiras xornadas poranse a disposición tamén das escolas deportivas do Concello, como material para facilitar a accesibilidade dos/as seus/súas usuarios/as. Nesta liña, o alcalde subliñou que o servizo poderá estar activo todo o ano a través destas e tamén do CPI Atios e escolas unitarias e lembrou que algúns nen@s non podían ata o dagora chegar á auga nas excursións escolares. Cousa que cambia a partir de hoxe.
Segundo o presidente de Aprende a Voar, Alejandro Permuy, Valdoviño convértese no primeiro municipio de Galicia en dispor dun servizo destas características e, nesta liña, avanzou a súa intención de presentar o proxecto na Mancomunidade, na Deputación e na Xunta co ánimo de estender a iniciativa de modo que cada concello conte a lo menos cunha praia con estes recursos. Agradeceu, en todo caso, a positiva resposta dada polo Concello de Valdoviño e a implicación dende o minuto un.
O servizo estará operativo todos os días de 12,40 a 19 horas, coincidindo co horario do servizo de socorrismo e o material debe retirarse na caseta situada a pé de praia. O Concello habilitou dúas prazas de estacionamento reservado nas inmediacións para @s usuari@s, e a reserva da cadeira autopropulsada debe realizarse previamente na Oficina Municipal de Turismo (de luns a xoves de 11 a 17 horas; venres de 11 a 18 horas, e sábados e domingos de 10 a 14 horas e de 16 a 20 horas), chamando ao teléfono 981 19 52 74. Así mesmo, o Concello pon a disposición dúas liñas telefónicas de suxestións: 619 410 161 e 619 291 133.
Esta tarde, acudían á Frouxeira para arroupar o proxecto a presidenta da ASCM, Paula Gárate; o tenista paralímpico Álvaro Illobre ou o deportista local galardoado na I Gala do Deporte, Miguel Romero. Todos eles seguiron de preto ao pequeno Eric, que foi o encargado de realizar a primeira viaxe ao areal a bordo destas cadeiras. Sen axuda e coa ilusión de alcanzar a auga, confirmaba o bo da iniciativa.
