Trátase dunha das medidas contempladas na modificación do regulamento do servizo municipal, aprobada definitivamente

Valdoviño, 1 de abril de 2022. O Concello de Valdoviño vén de aprobar definitivamente a modificación do regulamento do servizo municipal de abastecemento de auga e redes de sumidoiros. O novo texto, que pode consultarse no Boletín Oficial da Provincia do 24 de marzo (https://cutt.ly/WDlze74), contempla importantes cambios. Entre eles, e en caso de fuga por rotura da rede de abastecemento, veciños e veciñas abonarán a estimación do consumo calculado sobre a factura anterior en lugar do total da auga perdida. 

Deste xeito, equipárase o abono das posibles fugas a aqueles casos nos que se produce un erro ou avaría nos contadores. Un cálculo moito máis xusto para a veciñanza. 

Así mesmo, outra das modificacións aprobadas contempla a posibilidade de formalizar servidumes para permitir o acceso ao servizo de abastecemento de auga e saneamento. Servidumes de paso que deben contar co consenso dos propietarios das fincas ou terreos afectados. 

Por último, o novo regulamento permite aos particulares executar obras de extensión da rede de abastecemento e saneamento en unión con outros veciños e naquelas zonas nas que non exista unha previsión a medio-curto prazo de realizar obras municipais. Unha fórmula que se ten empregado no pasado e que foi suprimida na última modificación realizada hai uns anos.