Situada na Porta do Sol, unha informadora atenderá ao público de martes a domingo ata mediados do mes de outubro

Valdoviño, 18 de xuño do 2025. O Concello de Valdoviño reabría esta mañá as portas da Oficina Municipal de Turismo. As instalacións, situadas na Porta do Sol, serán atendidas por unha informadora ata mediados do mes de outubro, todos os días da semana -agás os luns, que pechará por descanso do persoal-. Martes, mércores e xoves atenderá ao público de 12:00 a 17:00 horas, namentres que venres, sábado e domingo, o horario será de 12:00 a 18:00 horas.

O alcalde, Alberto González, acompañado da concelleira de Turismo, Rosana García, achegábase esta mañá ata a oficina para dar a benvida á técnica, ao tempo que valoraba o apoio da Deputación da Coruña, financiando con 15.000 euros os gastos derivados da contratación, ao abeiro da liña de subvencións á que concorría o Concello de Valdoviño.