Máis de 120 tiradores de toda a Comunidade, de todas as categorías, daranse cita de 8:00 a 20:00 horas no pavillón municipal do Longoiro

Valdoviño, 28 de outubro do 2022. Valdoviño acollerá este sábado 29 de outubro a primeira proba da Liga galega de sala de tiro con arco. Máis de 120 tiradores de todas as idades -dende 7 anos para arriba- procedentes de toda a Comunidade daranse cita no pavillón municipal do Longoiro dende as 8:00 e ata as 20:00 horas. Competirán en todas as categorías: arco recurvo, composto, adaptado, tradicional, longbow e espido, na búsqueda duns bos resultados que os posicionen favorablemente para acceder á Liga estatal. De feito, participarán nesta aqueles e aquelas deportistas que acaden os mellores resultados en 3 das 5 probas incluídas no calendario autonómico. E desas cinco probas, 3 disputaranse no noso Concello. As seguintes datas serán a fin de semana do 12 e 13 de novembro, e a do 3 e 4 de decembro. 

Detrás da organización destas 3 probas da liga autonómica está o Club Arco A Frouxeira. A súa solicitude para celebrar en Valdoviño o grosso da liga recibiu o beneplácito da federación, logrando así atraer para a localidade esta importante cita deportiva na que tamén colabora o Concello. 

A competición deste sábado está aberta ao público, que poderá acceder de balde para seguir as diferentes modalidades.