Retirada de invitacións entre martes e venres de 16 a 20 horas

A Casa da Cultura de Valdoviño retoma a súa programación este domingo 28 de febreiro cunha montaxe teatral sobre igualdade e liberdade a partir de textos de Rosalía de Castro. Así, Os Quinquilláns representarán no auditorio do municipio a súa última montaxe, «A pluma viva de Rosalía». Será a partir das 18 horas e, para asistir, é preciso retirar invitación. Pode facerse na Casa da Cultura a partir de mañá en horario de tarde (de 16 a 20 horas). O prazo permanecerá aberto ata o venres (incluído) ou ata cubrir as prazas.

A función está dirixida a un público maior de 9 anos e inclúese na Rede Cultural da Deputación da Coruña 2020. Aborda un feito real de censura á obra de Rosalía. No ano 1864, a escritora visita por sorpresa a imprenta de Soto e Freire en Lugo. Catro textos brillantes, retranqueiros e satíricos de Rosalía están a piques de seren publicados, mais nas oficinas da imprenta acaba de acontecer un conflito moi violento e a escritora vai descubrir que todo ten que ver con ela e a súa obra.