O Concello de Valdoviño inicia o trampeo primaveral contra a velutina
O alcalde, Alberto González, informou esta mañá de que o Concello levará a cabo esta semana a campaña de trampeo primaveral contra a vesta velutina. Uns traballos que correrán por conta da Agrupación Local de Voluntarios de Protección Civil cos que tentar reducir e evitar a propagación de la velutina en Valdoviño. O rexidor apunta que «é o momento adecuado para atraer ás raíñas ás trampas que se van a instalar en parques e inmediacións de edificios municipais». En total, medio centenar. Nesta liña, o xefe de Protección Civil, Francisco Dopico, lembra a importancia «de que a xente tamén colabore no trampeo, instalando trampas no entorno das súas vivendas». Ao respecto, lembrou que o Concello pon a disposición da veciñanza o líquido atraínte.
A partir da instalación das trampas, os integrantes de Protección Civil revisarán cada dúas semanas o seu efecto e, máis adiante, substituiranse trampas e líquido por outro tipo que favoreza non só a atracción das raíñas, senón das vespas en xeral.
Así mesmo, o concelleiro de Servizos, Benito Vega, engadiu que os niños que se ven a día de hoxe en árbores están inactivos, xa que se anularon pero non foi posible a súa retirada.
Por último, apuntan que a velutina ten nas especies arbóreas e plantas de orixe asiática un foco de atracción importante, o que nesta zona é habitual con especies coma camelias.
Balance 2018
Os voluntarios da Agrupación Local de Protección Civil de Valdoviño retiraron ao longo do pasado ano un total de 321 niños de vespa velutina en todo o termo municipal. No balance anual, e por parroquias, Protección Civil anulou 87 niños en Valdoviño; 60 en Pantín; 57 en Lago; 53 en Meirás; 28 en Vilarrube; 17 en Sequeiro; 10 en Vilaboa e outros 10 en Loira. En moitos dos casos, foron os propios veciños e veciñas os que deron aviso para actuar e, noutros, foron resultado de inspeccións realizadas polo Concello. Sobre os lugares, a maioría das retiradas realizáronse en árbores ou tellados.
