O Concello suma dous aparcadoiros e reabre un terceiro na Frouxeira para adaptarse aos novos aforos marcados o sábado pola Xunta
O Concello de Valdoviño puxo hoxe en servizo dúas novas zonas de estacionamento con capacidade conxunta para uns 100 vehículos e reabriu unha terceira para outros 200 nas inmediacións da praia e lagoa da Frouxeira. Unha medida que responde ás novas indicacións, en materia de aforo, marcadas pola Xunta de Galicia e publicadas no Diario Oficial de Galicia o pasado sábado, no que se reduce de 4 a 3 metros cadrados o espazo por persoa nas praias, ampliando deste xeito o número permitido de usuarios e usuarias. Coa decisión tomada respecto á reapertura dunha das áreas, a da zona da Saíña, próxima á praia pequena, o Concello tamén tentou dar resposta ás demandas trasladadas por unha parte dos representantes do sector da hostalería da zona, que solicitaban máis espazo para aparcar para atender ás necesidades dos/as seus clientes. Coa reapertura gáñanse neste caso 200 prazas.
O segundo espazo sitúase a escasos metros do cámping da Lagoa, moi próximo ao parque infantil e parque biosaudable, con capacidade para outros 50 vehículos. E, o terceiro aparcadoiro, ocupa uns terreos emprazados no mesmo inicio do paseo da lagoa da Frouxeira, tamén con capacidade para outro medio centenar de vehículos. Coa posta en servizo destes espazos búscase diversificar o acceso ao areal.
En todos os casos, a medida é posible tras as xestións realizadas polo Concello de Valdoviño coas persoas propietarias das fincas, que cederon o seu uso para destinalo a estacionamento provisional. Para persoas residentes e visitantes. Así mesmo, nos últimos días, o Concello procedeu á limpeza e desbroce dos terreos e, nalgúns casos, acometeu pequenas obras de accesibilidade, de cara a facilitar a entrada nestes espazos.
