O Concello abre o prazo de inscrición no Festival de Comparsas de Valdoviño

A Concellería de Cultura de Valdoviño abrirá o vindeiro luns 17 de febreiro o prazo de inscrición no XX Festival de Comparsas, que terá lugar o sábado 29 de febreiro. Para formalizala é preciso presentar a documentación requerida na Casa da Cultura (que poderá descargarse da web municipal) e o prazo rematará o día 24 de febreiro (incluído). O horario de atención é de luns a venres de 11 a 14 horas.
 

Montse Funcasta inaugura na Casa da Cultura “Valdoviño, lugar de constrastes”

Cartaz da exposición

A fotógrafa Montse Funcasta inaugura este venres, 14 de febreiro, a mostra «Valdoviño, lugar de contrastes». Será na Casa da Cultura de Valdoviño a partir das 20,30 horas nun acto aberto á veciñanza.
 
A través desta exposición, a artista proponse relatar en forma de imaxes os seus momentos fotográficos máis visuais e lúcidos desta contorna, destacando as súas espectaculares postas de sol, os seus emblemáticos paseos e os lugares, en definitiva, que conforman esta mostra que nos ensina eses espazos que merecen a pena visitar sen présa.
 

O Concello tramita as solicitudes para participar no programa Elixe Galicia

O Concello de Valdoviño, a través do departamento municipal de Servizos Sociais, tramita as solicitudes para participar no programa «Elixe Galicia», impulsado pola Axencia Turismo de Galicia. Trátase dunha liña de axudas para financiar as vacacións de tres colectivos: familias (ademais da parella, inclúense as persoas que dependan dela por filiación), persoas maiores (pensionistas e, no caso de viúdos/as a partir de 55 anos, xubilados/as e desempregados/as maiores de 60) e mocidade (menores de 30 anos). Non hai limitacións por cuestións de renda.
 

Arranca en Valdoviño o Programa Integrado de Emprego dirixido a mulleres

Acto de presentación do programa

Fomentar e promover a igualdade entre homes e mulleres xunto co reparto equitativo do coidado da familia e das tarefas domésticas figuran entre os obxectivos do Programa Integrado de Emprego que impulsa a Mancomunidade de Concellos de Ferrol en colaboración coa Xunta de Galicia. Un programa que onte pola mañá arrancaba en Valdoviño. Na casa consistorial, o alcalde, Alberto González, e o xerente da Mancomunidade, Luis Alcalá, daban a benvida ás 11 mulleres participantes.

O Concello insta a Xunta e Goberno central a asumir o custo da prestación do servizo de axuda no fogar

O pleno do Concello de Valdoviño aprobou instar á Xunta de Galicia e ao Goberno do Estado a asumir o custo da prestación do servizo de axuda no fogar, unha competencia que lles é propia ou, cando menos, dotar aos concellos das cantidades orzamentarias suficientes para facerlle fronte, chegando como mínimo á aportación que fai a Deputación.

Nova xornada formativa sobre a sede electrónica e a tramitación de subvencións

O Concello de Valdoviño, en colaboración coa Deputación provincial da Coruña, celebra mañá mércores a segunda e última das xornadas formativas sobre o uso da sede electrónica municipal e sobre a tramitación de subvencións. Será na casa consistorial en horario de 10 a 11 horas sobre o uso da sede electrónica, e de 11 a 12 horas sobre a tramitación de subvencións. A participación é libre e de balde e non se require de inscrición previa.
 

Presentación do Programa para a Mellora da Viabilidade das Explotacións Gandeiras de Seitura 22

Cartaz da xornada

A Asociación Seitura 22 impulsa o Programa para a Mellora da Viabilidade das Explotacións Gandeiras e, este martes 11 de febreiro, levarase a cabo a partir das 12 horas a súa presentación no Centro de Dinamización Seara, no polígono de Penapurreira en As Pontes. Un acto aberto a toda persoa interesada no proxecto.
 
O proxecto consiste na posta en marcha dunha plataforma colaborativa para a mellora da eficiencia nas explotacións agrogandeiras, de produción leiteira ou cárnica, en base á xestión económica e técnica, no ámbito de actuación da asociación Seitura22.

O Concello pon en marcha terapias específicas para persoas afectadas de alzheimer e outras demencias

Cartaz talleres alzheimer

O Concello de Valdoviño, municipio solidario co alzheimer, impulsará terapias específicas para as persoas afectadas a partir desta semana. Así o avanzou o alcalde, Alberto González, para sinalar que o obxectivo é mellorar a atención aos veciños e veciñas que padecen esta enfermidade e tamén procurar un respiro familiar para os seus coidadores. Así, Afal guiará as terapias cada semana. Serán mércores e xoves, de 18 a 20 horas, no local da Asociación A Frouxeira, moi próximo ao centro de saúde e á casa da cultura.
 

A unidade móbil de doazón de sangue desprázase a Valdoviño este martes

Cartaz presenza da unidade móbil en Valdoviño

O Concello informa á veciñanza de que a unidade móbil do Centro de Transfusión de Galicia desprazarase ao municipio este martes 11 de febreiro. Estará diante da casa consistorial en horario de mañá –de 10 a 14 horas- e de tarde –de 16 a 21 horas-.
 
Calquer persoa maior de 18 anos, que pese máis de 50 quilos e non padeza nin teña padecido enfermidades transmisibles polo sangue (VIH, hepatite B ou C,...), pode doar. A doazón de sangue é un acto sinxelo que permite a moitas persoas solucionar o seu problema de saúde e mesmo salvar a súa vida.

Últimos días para apuntarse á xornada entre empresas e autónomos locais organizada polo Concello de Valdoviño

O Concello de Valdoviño pechará o vindeiro venres, 14 de febreiro, o prazo de inscrición na xornada entre empresas e persoas autónomas con sede no municipio que organizará este mes como punto de encontro para dar a coñecer os seus servizos e establecer redes de colaboración. Celebrarase o xoves 20 de febreiro ás 20 horas no salón de actos da Casa da Cultura e está aberta a todos os sectores económicos.

Páxinas

Subscribirse a noticias