O Concello retoma a programación cultural cunha sesión de títeres na Frouxeira e cine ao aire libre en Meirás

O Concello de Valdoviño retoma a programación cultural e faino con dous espectáculos ao aire libre dirixidos a un público familiar. O primeiro deles terá lugar este domingo, 5 de xullo, a partir das 19,30 horas no parque da praia da Frouxeira. Alí, a compañía Mircromina Títeres representará a súa obra «Vacacións no mar» . A seguinte cita celebrarase o xoves 9 de xullo, a partir das 22,45 horas no campo da festa de Meirás. Este espazo converterase nunha sala de cine ao aire libre para acoller a proxección do filme «O Bosque Animado». Nos dous casos, citas incluídas na Rede Cultural da Deputación provincial da Coruña.
 
A entrada nun e noutro caso é de balde, pero precísase retirar invitación previamente na Oficina Municipal de Turismo sita na Porta do Sol -un máximo de 5 por persoa-. Así, para o espectáculo deste domingo pódese facer hoxe luns 29 de xuño, mañá martes 30 de xuño e mércores 1 de xullo entre as 11 e as 17 horas. Tamén o xoves 2 de xullo de 11 a 14 horas.
 
Así mesmo, o Concello de Valdoviño axustarase en todo momento á normativa vixente en relación á prevención da Covid-19. Nesta liña, decidiu programar as actividades ao aire libre, delimitando os espazos e adaptándoos ao aforo permitido. O uso de mascarillas será obrigatorio naquelas actividades nas que non se poida manter a distancia de seguridade, e o Concello recomenda o seu uso xeneralizado en todas elas. Ademais, cando a Área de Cultura decida que a actividade de exterior pase a realizarse no auditorio da Casa da Cultura, só poderán asistir aquelas persoas que teñan a invitación.
 
Por último, e no caso de que sobrasen invitacións, estarán a disposición do público o mesmo día da actividade e repartiranse por orde de chegada das persoas interesadas. De igual xeito poderán ser dispostas para o seu uso aquelas cadeiras que non fosen ocupadas polas persoas que tendo invitación  non acudan á actividade ou chegasen tarde ao acto. Non se admitirán as reclamacións por estas circunstancias.