O Concello abre o prazo de inscrición no Festival de Comparsas de Valdoviño

A Concellería de Cultura de Valdoviño abrirá o próximo luns, 25 de febreiro, o prazo de inscrición no XIX Festival de Comparsas, que terá lugar o sábado 9 de marzo. Para formalizala deben presentar a documentación requerida na Casa da Cultura antes do día 1 de marzo. O horario de recepción das solicitudes na Casa da Cultura é de luns a venres de 10 a 14 horas. Tamén o xoves 28 de febreiro en horario de tarde, de 15 a 18 h.

O Festival de Comparsas repartirá 3.300 euros en axudas á participación -300 euros máximo por comparsa, 150 nun vale para a mellor e outros 150 en tres vales de 50 canxeables no comercio local para os mellores disfraces individuais-. Haberá tres categorías: comparsas adultos, comparsas infantís e outros. Nesta última categoría entran os disfrazados a título individual, as parellas de disfraces e grupos de ata cinco persoas. A título de disfrace individual non se admitirán menores. Porén, estes si poderán formar parte de parellas ou grupos sempre e cando haxa un adulto responsable.

A parella ou grupo deberá de manter unha uniformidade de criterio na súa indumentaria. O festival arrancará ás 17,30 h cun pasarrúas entre a casa consistorial e a Casa da Cultura. Neste último espazo habilitarase unha carpa para acoller o festival propiamente dito, que estará conducido polo grupo de teatro galego Ghazafelhos. Cada comparsa interpretará ante o público un máximo de dúas cancións ou parodias ou ben, unha parodia e unha canción. Así mesmo, polo menos unha delas terá que estar escrita e interpretada en linga galega e unha delas xirar en torno a Valdoviño.

O xurado estará integrado por un representante de cada unha das comparsas, que poderá votar a todas menos a aquela que representa. En todo caso, terán en conta a orixinalidade e vistosidade do disfrace, a posta en escena, as letras das cancións ou parodias, a simpatía e a animación de rúa que realice o grupo participante.

Por último, as bases poden consultarse no seguinte enlace: Bases do XIX Festival de Entroido.