Jonathan Fernández Ríos, vencedor absoluto da III carreira Volta ás Forcadas

Unhas 150 persoas de todas as idades tomaron parte onte na terceira edición da carreira Volta ás Forcadas, organizada polo Concello de Valdoviño no marco do circuito Corre polo Norte. Nesta liña, o edil de Deportes, Sergio Saavedra, valorou moi positivamente as cifras de participación, que consolidan xa esta cita deportiva no calendario municipal, e agradeceu moi especialmente a colaboración e implicación da veciñanza, clave na organización da proba.
 

Unha vintena de veciños achéganse ás técnicas de cociñado de peixes e mariscos da man do GALP Mariña-Ortegal

Imaxe de grupo das persoas participantes

Un total de 23 veciños e veciñas de Valdoviño tomaron parte o pasado sábado no obradoiro de formación en cociñado de peixes e mariscos da Mariña-Ortegal celebrado na cociña do CPI Atios. Unha acción, impartida polo chef Miguel Mosteiro, cociñeiro especializado na gastronomía galega e a cociña de territorio, que estivo organizado polo Grupo de Acción Local do Sector Pesqueiro A Mariña-Ortegal (GALP A Mariña-Ortegal) en colaboración co Concello.
 

Arrancan os obradoiros gratuítos de estimulación cognitiva para maiores de 60

Foto de familia sesión na Biblioteca de Valdoviño
Inicio do obradoiro en Valdoviño

Un total de 31 veciños e veciñas maiores de 60 anos iniciaron esta semana os obradoiros de estimulación cognitiva que promove, gratuitamente, o Concello a través da Concellería de Cultura. Unha actividade que, impartida polo técnico municipal Daniel Cartelle, se desenvolve en Valdoviño e en Meirás, e na que participan veciños e veciñas de todas as parroquias do municipio.
 
Os talleres celébranse na Biblioteca Municipal de Valdoviño os xoves en horario de tarde –de 17 a 18,15 horas- e no local da AVV de Meirás os martes –de 9,30 a 10,45 horas-.
 

Titiribaile trae este domingo a Valdoviño o seu espectáculo A nuestra manera

A narradora Erica González

O auditorio da Casa da Cultura de Valdoviño albergará este domingo, 21 de outubro, o espectáculo A nuestra manera, da compañía Titiribaile. Un show dirixido a rapaces e rapazas maiores de 12 anos protagonizado pola contadora Erica González con música en director de Pablo Balseiro. No mesmo, abordaranse diferentes valores como a felicidade ou a amizade. Música de onte e de hoxe, contos e poesías de sempre, textos de Benedetti...
 

O Concello destina 11.000 euros ás subvencións para apoiar as actividades culturais e sociais do movemento asociativo

O alcalde, Alberto González, informou esta mañá de que o Concello abrirá mañá venres, e por espazo dun mes, o prazo para que as entidades e asociacións sen ánimo de lucro asentadas en Valdoviño poidan solicitar as subvencións municipais de apoio ás actividades de carácter cultural, social e divulgativo realizadas no presente exercicio. As bases reguladoras da convocatoria publicáronse hoxe no Boletín Oficial da Provincia para a súa consulta. No seu conxunto, o rexidor explicou que o Concello reserva unha partida de 11.000 euros para este fin.
 

Páxinas

Subscribirse a Concello de Valdoviño RSS